一到生日啲人又開始問: 你究竟幾時結婚呀？
由一開始會直接當場俾人逼瘋，到而家已經可以心如止水面對 - 我估都算係人生小確幸嘅一種。仲記得上年30歲生日嘅前夕心突然有一股低潮感出現，而的確今年嗰股低潮感又想慢慢滲出嚟入侵我... 令我再次質疑自己究竟係咪喺生活上面是否太過堅持些什麼。
其實幾多歲先至係適婚年齡呢？
對女人黎講其實應該係無適婚年齡，只有適合生育年齡同適婚心態。而家科技昌明，好似大S咁39歲都仲追到個仔。當然產後回復俾後生產婦嘅慢，但係醫學嘅進步已經將「高齡產婦」嘅年紀不斷推遲；而且如果你唔打算要細路仔嘅話就根本就唔需要喺適合生育嘅年齡結婚。
咁適婚心態呢？ 生理成熟，經濟獨立係適婚條件，但末必係適合結婚嘅地步。我覺得幸福同婚姻未必有直接關係。幸福與否，結婚與否，並唔係因為人數嘅增加，而係你本身有無積聚幸福嘅能力。如果你本身個人生活無趣，一直期待有另一個人拯救你而結婚嘅話唔係幸福；如果你因為寂寞就漁翁撒網，有人肯娶你就嫁都唔會幸福。你連自己喺生命裏面想要啲咩都唔清楚仲想學人成家立室？唔好講笑啦。
男人無適婚年齡，仲越老越值錢；亦無適合生育年齡，as long as 粒精子夠強壯幾多歲都仲可以生育。男人大概最需要嘅係適婚嘅心態，同適婚嘅銀行存款。
婚姻係自己揀嘅，日子係自己過嘅，再苦再甜都係自己嘅。唔需要做俾人睇亦唔需要同其他人交代。
雖然仍然單身，但慶幸我仲有好多朋友將會同我慶生，而我亦都知道嗰股低潮感會喺四日之後再次消失... 而家反而最希望嘅係大家手下留情，呢幾日唔好灌醉我... 哈哈!!
Search